The Legend of Shankhadhar : Teaser Released
Thursday 12th November 2015
Embassy of Nepal, Notting Hill, London, UK
The teaser of yantrakala’s forthcoming animated feature film ‘Shankhadharyaa Baakha’ was released at the Embassy of Nepal, London, during the Nepal Samvat 1136 celebration organised by Pasa Puchah Guthi UK.
A speech by Sanyukta Shrestha at the event to mark the teaser release is as below:
नेपा:या न्हापांगु एनिमेशन संकिपा –
“शंखधरया बाखं”
– संयुक्त श्रेष्ठ, बेलायत।
(पासा पुच: गुथि युकेया ग्वसालय् लंदनय् च्वंगु नेपा:या दूतावासय् न्हू दँ ने सं ११३६ हनेगु झ्वलय् तयागु खँ।)
नेपा:या थ:गु संवत् नेपाल संवत््यागु ११३६गु न्हू दँ झ: झ: धायेक: हनेत झायादीगु सकल भाजु मयेजु यात दुनुगलं लसकुस! लंदनय् झीसं नेपाल संवत् न्हू दँ हनागु थुगु स्वकूगु लसताय् न्हू ज्याझ्व कयाहयेगु जित हाकनं छक्व चू लागु दु। गूगु निंति जिं पासा पुच: गुथिया ज्यासना पुच:यात जक्व सुभाय् देछाये। थुगुसि जिं छिकपिंत “शंखधरया बाखं” धइगु निर्माणाधीन संकिपाया चिहाकूगु म्हसिका न्ह्यब्वये।
थौं स्वया १५ दँ न्ह्य: नेपालय् एनिमेसनयागु खँ ल्हाये बलय् यक्व मनुतय््सं मथु। उगु इलय् एनिमेसन धइगु खँग्व: न्हू हे तिनि। उलि जक: मखु, इंजिनियरिङ परिषदय् दर्ता याये वने बलय् न एनिमेटर धइगु न ज्या जुइला धका न्यनिगु।
अथेंतु निगु दशक न्ह्य: जिं छगु त:धंगु हे म्हंगस: खना, – नेपाली भासं एनिमेसन संकिपा दयेकिगु्। गूगु निंति ९ ला तक: यक्व हे संघर्ष यायेमाल। अयेसां एनिमेसन धइगु उलि अ:पूगु विधा मखु खनि। थाय्-थासय् ज्या यानाच्वपिं थ्यं-मथ्यं ५०० प्राविधिकत जुया ५-६ दँ तक: मदिक्क ज्या याना न १-२ घण्टायागु जक: सखिपा दयेकी। अथे धका उगु इलय् जिं न बाँलाक: मस्यु।
थौं वया नेपामितय््सं प्राविधिक ख्यलय् यक्व हे परिवर्तन हयेधुंकूगु दु। नेपा:या जनशक्ति हलिमय् गन जक: मथ्यं? थी थी इंजिनियरिङ विधाय् सुथां लायेक: ज्या न यानाच्वन।
एनिमेसनयागु ख्यलय् जिं मयासां मेपिंस ला या हे याइ धइगु जित बिचा: वल:। अय््सां वंगु १५ दँय् न नेपा:या थ:गु शैलीया एनिमेसन संकिपा पिहाँ वये मफुत। थुलि खने धुंका, त:धंगु योजनाया निंति धेबा व प्रविधि जक: मखु थ:म्ह म्हंगस: न स्वयेमा खनि धइगु जिं थुल। नेपा: व नेपामितय््गु निंति छु यायेगु म्हंगस:। जिगु थुगुमहंगसय् मीलय् घ्य: तयेगु ज्या पासा पुच: गुथिं यात।
धाथें धायेसा ५ दँ न्ह्य: तक: न जित नेवा: भासं खँ ल्हाये मव:। नेवा: तजिलजियागु ज्ञान दइगु ला खँ हे मन्त। ८ दँ न्ह्य निसें जिं थुकि न्यनेकने यायेगु ज्या न्ह्याका। अलय् वना जख: थ:गु पुलांगु म्हंगस: पूवंकीगु लँय् पला न्ह्याकेफत:। थुगु झ्वलय् शंखधर साख्वायागु थौं तक: पिदंगु्-मपिदंगु दक्वथें च्वसु, शोधपत्र व चि-चिधंगु बुखं हक: न मुंका जित बियेगु डा. बालगोपाल श्रेष्ठ दाजुं यानादिल। प्रा. कमल प्रकाश मल्ल, प्रा. मानिकलाल श्रेष्ठ व प्रा. काशीनाथ तमोटपिंसं थुकि यानादीगु ज्या लुमंकेबह: जु।
नेपाल संवत््या न्ह्यछ्यलामि शंखधर साख्वाया बाखंयागु लिधंसाय् थुगु एनिमेसन संकिपा नेपालभाषा व नेपाली भासय् दयेकिगु ज्या न्हू दँ ११३७ तक: सिधयेकिगु ग्वस: ग्वया। छिकपिनिगु मतिना दइ धइगु भलसा काये।